Category: news

Riba Diabierna 19 di april 2024 den su reunion general di miembrecia, a elegi e hunta di directiva di
Aruba Trade and Instustry Association (ATIA). Durante e prome encuentro di e hunta di directiva nobo a
elegi e hunta di directiva diario esta e “Daily Board” pa 2024 – 2025.

Mester indica cu e “Daily Board” ta wordo forma pa e siguiente posicion nan: Presidente, Vice
Presidente, Tesorero, y Secretario. E hunta a elegi Sr. Danilo Werleman como su presidente nobo.
Tambe a re-eligi, Sra. Gina Habibe como vice-presidente y Sr. Enrique “Tito” de Cuba como secretario y
Andrew Harms, como tesorero respectivamente. Tambe a elegi e reémplasante nan di e tesorero y
secretario kenda nan ta Sr. Fred Steeghs y Sra. Jenniffer Figaroa-Guzman respectivamente.

Director di ATIA ta sumamente contento cu e “Daily Board” cu lo dunele guia den aña 2024 y 2025, sigur
un aña yen di reto, entre otro e situacion cu nos mercado laboral ta aden awo unda no tin suficiente
hende pa traha y tin hopi projecto nobo na caminda. E escaces di labor tin un efecto directo y indirecto
riba comercio y economia di Aruba. ATIA, awo especialmente, su expertonan ta deliberando solucionnan
practico y innovativo pa por alivia temporalmente e escaces aki. Tambe ATIA lo forma parti di un task
force, unda hunto cu sindicato y gobierno lo presenta solucionnan temporal cu ta practico. Como gremio
nos ta advoca pa e ley laboral bira uno mas moderno, agil y “performance based”.

Banda di e retonan ATIA lo organisa diferente evento nan pa miembro y pa publico. Algun di e
eventonan pa aña 2024 ta diferente business mixers, encuentro cu Departamento di Impuesto y
Aduana, varios workshops y tambe e Networking event mas grandi di Aruba cu ta ATIA su Corporate
event Annual. Finalmente, e director a informa cu e 2024 lo mira e regreso di LIDERA na September, un
conferencia cu a impacta mas cu 800 persona na 2022. ATIA ta suplica pa sigui nan riba nan rednan
social pa tur informacion.

Diabierna 19 di april 2024, Aruba Trade and Industry Association (ATIA) a tene su
reuniun general di miembrecia den e sala di conferencia di ATIA.
Prome cu e parti oficial, Sr. Roly Sint Yago, Presidente di hunta di The Aruba Fair Trade Authority (AFTA)
y Sr. Martijn Snoep, miembro di hunta di AFTA, a duna un presentacion interesante riba e tema di
“Trabounan y strategia di AFTA” pa 2024 y futuro. Despues di e presentacion e miembronan presente
por a hasi nan pregunta na e team di AFTA.

Durante e reunion a presenta e resultadonan di 2023 y e enfoke pa 2024 y alabes a eligi e miembronan
di e hunta di directiva pa aña 2024 – 2025.

Enfoke y resultado 2023

Durante 2023, ATIA su enfoke tawata primordialmente riba cambionan den leynan di impuesto y BBO na
frontera. Alaves ATIA a keda participa den varios stakeholders meetings riba e temanan di reforma
fiscal, ley laboral, y clima di inversion den nos economia (“red tape”). Pa e ley laboral por ehempel a hasi
reunionan bipartite cu sindicatonan pa por yega na otro riba algun tema importante. Ainda ATIA ta en
espera pa e tema aki yega parlamento pa por wordo presenta, discuti y tambe aproba. Directiva a
incidica cu a traha hopi riba e relacion cu stakeholder y departamentonan concerni cu ta importante y
positivo pa e miembresia di ATIA. Ta door di e relacionnan aki a bin cu e idea pa hasi un Town Hall cu
Departamento di Impuesto (DIMP) y Aduana tocante e BBO na frontera y asina crea un “help desk” na
DIMP pa cu pregunta tocante BBO na Frontera.

Tambe ATIA a sigi enfoka durante e aña riba desaroyo di e habilidadnan y expertisio di su miembronan y
nan empleadonan por medio di diferente workshops, sesionan di informacion y eventonan pa
engrandese e netwerk di miembronan di ATIA. Workshops y cursonan exitoso tawata “Continued
Financial Excellence Program”, “Declarant Douane” y “Abolishment of the self-administered pension”.
No por a lubida e tan gusta y sold-out Business Mixers, pero tambe e ATIA su Corporate Event anual
tema “Now is the Future” cu a atrahe mas cu 350 bishitante.

Enfoke pa 2024 y futuro

Pa aña 2024 y 2025, ATIA lo enfoca mas riba e tema laboral especialmente awo cu tin un escases riba e
mercado laboral. Tambe e presion extra cu esaki ta presentando cu tur e projecto nobo nan cu ta
habriendo den 2024. Otro temanan cu ATIA lo keda enfoca riba dje ta reduccion di “Red Tape”, incentiva pa inversionista local y internacional, y tambe pa den futuro Aruba transicional pa un BTW. ATIA hunto
cu su expertonan tambe ta haciendo diferente estudio riba temanan cu a keda nombra den e reunion,
pero lo keda pa awo solamente pa e miembro nan di ATIA.

Hunta di Directiva 2024-2025

Pa aña 2024 – 2025, e hunta di directiva a despidi di 2 miembro cu a forma parti di e hunta pa hopi añ
esta Sr. Frank Snijders, cu a guia ATIA como Presidente e ultimo 4 aña, y Sr. Matthijs Bijen,
representando “WAB” cu ta e gremio di compania di construccion. ATIA ta gradisi Frank y Matthijs pa tur
nan añanan di aporte valioso como Presidente y miembro di hunta di ATIA. E presidente, vice-
presidente, tesorero y secretaria nobonan, lo wordo eligi durante e prome reunion di e hunta y ATIA lo
anuncia esei ora nan a wordo elegi.

E hunta di directiva di ATIA pa 2024 – 2025 ta consisti di: Sra. Gina Habibe, Sr. Enrique “Tito” de Cuba, Sr.
Andrew Harms, Sra. Tisa LaSorte, Sr. Roland Croes, Sr. Danilo Werleman, y Sra. Jenniffer Figaroa-
Guzman. ATIA ta contento pa anuncia su 2 miembro nobo nan cu ta Sra. Rachel Maduro y Sr. Fred
Steeghs.

E reunion a culmina cu un networking event pa e miembronan presente na ATIA su “Bao Palo Terrace”.