Month: February 2017

E siman aki a tuma lugar un sesion informativo pa tur compania cu ta declara carga y mercancia. Riba peticion di varios companianan importador, douane cu asistencia y facilitacion di ATIA lo ta tresiendo un curso den cual lo toca tur tema cu tin di haber cu e proceduranan di declaracion di mercancia na douane. E meta di e curso ultimadamente ta un miho servicio, cu lo aporta na crecemento di economia di Aruba y lo stimula comercio internacional.

Transaccionan comercial ta cana bon solamente si e fluho di informacion y documentonan ta bon organisa.

Conocemento di e procedura y e capacidad pa aplica e proceduranan aki corectamente ta sigura cu e productonan por move sin tardansa inecesario. E curso “Declarant Douane” lo ofrece conocemento intensivo di e legislacion di douane na un manera practico pa asina e brokers por tin un miho comprension di e proceduranan y asina anticipa na mes momento unda por tin posibel problema y con pa resolve esakinan na un manera efectivo.

Lo ripiti e curso mas despues den aña pa asina por brinda e oportunidad na tur broker na Aruba pa hasi e curso.

Durante e reunion, señor Marcelito Pablo como cabesante di e curso a informa un sala yen, di tur e detayes di e curso cu lo cuminsa 2 di maart y lo finalisa na final di juni cu un examen. E interes tawata hopi grandi y e prome tanda di e curso ya caba ta casi yen cu un maximo di 25 persona. E curso lo tuma lugar tur diamars y diahuebs di 6:30 pa 8:30 di anochi na oficina di ATIA. Pa mas informacion por tuma contacto cu ATIA via info@atiaruba.org.

ATIA a tuma nota di e preocupacion cu ta reina den nos comunidad encuanto e cantidad di atraconan cu a tuma lugar ultimamente. Casi diariamente por lesa den medionan di comunicacion di caso di atraco, y awor tambe atraconan na residencianan. ATIA ta aplaudi e manera cu e casonan aki ta wordo soluciona dor di nos cuerpo policial, pero mester evalua kico ta e origen di e aumento den e ultimo lunanan aki. Tanten cu no deal cu e origen di e problema adecuadamente, e resultado lo ta uno meramente temporario.

ATIA ta urgi pa medidanan mas drastico pa garantisa proteccion di nos pueblo. Den pasado caba, ATIA a boga pa nos leynan wordo adapta pa duna mas autoridad na instancianan judicial pa ehecuta esaki eficientemente.

Un di e sugerencianan di ATIA den pasado, tawata pa hisa castigo pa esnan cu ta carga arma y hasta a pidi un condena minimo si un hende ta carga un arma ilegal. Tin e sentimento general cu hopi hende ta cana rond cu arma ilegal y no ta basila pa usa e armanan aki pa comete crimen.

Den e presentacion na Parlamento e siman aki, Kuerpo Policial di Aruba a revela cu e di dos grupo mas grandi di atracadornan envolvi den e casonan di atraco anja pasa y e grupo di mas grandi e anja aki ta personanan cu ta drenta legal na nos isla. ATIA ta di opinion cu nos mester frena personanan ilegal na Aruba. ATIA a tuma nota di e taskforce cu ta ensera varios departamento necesario den e proceso di detencion y deportacion di ilegalnan, cual riba su mes ta un iniciativa positivo, pero mester tuma medidanan mas drastico y control mas severo na e costanan di nos isla pa ilegalnan no drenta nos isla via lama. Tambe control severo pa evita cu personan ta drenta cu pasport legal pero documentonan falso via aeropuerto, comete nan actonan criminal y despues no por identificanan.

Criminalidad ta afecta nos pueblo y nos economia directamente, pa e motibo aki, ATIA ta di opinion cu solucion di e asunto aki merece di ta prioridad pa Gobierno. Ta necesario pa tuma accionan necesario, adapta nos leynan y hasi e inversionan necesario pa combati e ola di criminalidad aki. Henter nos comunidad mester aporta na soluciona criminalidad ariba nos isla, como ciudadano tambe nos mester ta atento pa actividad sospechoso, raporta esaki na e instancianan indica pa tuma accion y coopera cu polis pa asina di nos banda tambe contribui na un Aruba mas sigur.