Month: January 2023

ORANJESTAD – Gobierno di Aruba (GoA) a informa comunidad di Aruba na augustus cu no lo continua, pa awo, cu e reforma fiscal pa un sistema di BTW, pero a opta pa keda cu e sistema actual y hisa BBO. Adicionalmente, GoA a informa cu nan a opta pa introdci algun di e medidanan cu mester a bin cu e reforma fiscal pa un BTW, awo hunto cu e subida di e BBO. ATIA a vocifera den pasado caba riba algun di e medidanan.
ATIA kier informa cu e ta sumamente preocupa paso aki 32 dia e ley fiscal nobo mester drenta na vigor, pero ainda no tin claridad kico exactamente ta bai tin den e ley. Te ainda ta loke nos por a lesa of mira riba socialmedia solamente, pero nada specifico. Loke nos kier evita ta loke a pasa ora a introduci BBO na inicio, cu esaki a pasa di un dia pa otro sin cu commercio por a prepara dignamente.
Como gremio commercial nos tin un deber na nos miembronan y comercio di Aruba completo pa tene nan bon altura kico e cambionan den ley lo ta y ki efecto esaki tin riba un compania y tambe economia di Aruba. Pero tambe pa yuda nan te unda cu nos por pa prepara pa e cambio nan cu ta na caminda. E proceso pa cambia tur prijs ta uno cu ta tuma su tempo paso e BBO ta inclui den e prijs di e productonan.
Finalmente, mester indica cu ATIA lo a prefera un reforma total pa un systema di BTW, paso un sistema fiscal cu un base amplio, simpel y cu ta regula su mes, lo ta mas beneficial pa isla di Aruba. Pero como december y dia nan di fiesta ta den porta, ATIA ta hasi un suplica na GoA pa duna comercio suficiente tempo y oportunidad pa prepara pa hasi e cambionan administrativo necesario cu ta bin cu e ley di BBO y otro medidanan nobo.

ORANJESTAD – Aruba Trade & Industry Association (ATIA), ta conciente cu costo di bida na Aruba a subi mescos cu mayoria pais na mundo pa via di factor nan como, disrupcion den e “supply chain”, costo di flete halto (pero menos halto cu durante pandemia) y e guerra entre Russia y Ukraina. E factor nan aki a subi e precion inflatorio cu Aruba ta importa paso nos isla ta importa casi tur cos y no ta produci suficiente pa sostene su ciudadanonan y visitantenan.
Consideracion pa subi sueldo minimo
Pa e factornan menciona aki riba ATIA ta premira un subida den e sueldo minimo (minimum loon), pero nos no sa kico e subida lo ta. ATIA no ta contra un subida di sueldo minimo, paso e poder di compra di nos tur como ciudadano a baha. Loke nos kier claridad riba dje como gremio commercial ta cuanto (ki percentage) e sueldo minimo lo subi cune y pa ki dia esaki lo wordo afectua. Den pasado e efectua e subida nap or ehempel februari retroactivo per 1 januari, pues empleador nan mester a paga e difirencia pa luna di januari na luna di februari. Esaki tin efectonan riba budget di companianan cu a wordo normalmente aproba algun luna prome cu aña bolter, pero tambe e likides di e compania cu ta wordo husa pa cumpra inventario pa bende.
Efecto di un subida di sueldo minimo
Normalmente Gobierno di Aruba ta hasi un anuncio pa cu e sueldo minimo despues cu a haya conseho di SER (Sociaal Economische Raad). Ta keda na Minister di Labor pa accepta e conseho, of implementa su mes decision ignorando conseho di SER. Mester tene na cuenta cu un aumento di sueldo minimo no lo solamente afecta esunnan cu salario minimo, pero tur salario di tur empleado lo mester subi igual. Esaki tin efecto riba prijsnan di productonan paso, tur comerciante ta inclui e costo di salario di empleadonan den e calculacion di prijs final.
Ya caba ATIA a informa den ultimo simannan cu prijsnan lo subi pa via di e subida di BBO y otro medidanan cu lo wordo introduci pa Gobierno di Aruba (GoA) cu e ley fiscal nobo cu ta na Parlamento pa aprobacion pa. Pues nos suplica ta bai na GoA pa hasi e anuncio pa cu subida sueldo minimo mas pronto posibel pa comercio por adapta nan budget pa 2023 ainda pa tuma e efecto den consideracion. ATIA por a tuma nota cu otro paisnan den reino ya caba a anuncia subida di sueldo minimo desde luna pasa pa nan comerciante nan local por cuminsa prepara.