INDEXERING DI 11.7% – KICO PUEBLO LO HAYA A CAMBIO?

A tuma nota den medianan social cu tur ambtenaar y gelijkgestelden lo bai haya un
indexering den dos taza, uno na juli di 6% y pa 1 januari 2025 di 5.7%. Como gremio comercial
representanto companianan priva y semi-gubernamental, nos di Aruba Trade and Industry Association
(ATIA) tin algun pregunta over di kico nos como pagado di impuesto lo haya a cambio di e indexering. No
mester compronde robes, nos ta pro cu tur empleado na Aruba merece nan debido salario, pero mester
tambe bin a cambio di “performance”, aumento di productividad. Den e acuerdo no tin nada cu
Gobierno, como representante di pueblo, ta pone a cambio di un indexering.
Preguntanan cu nos tin ta e indexering lo sigura cu servicio na tur departamento lo mehora?
Departamentonan lo bira mas accesibel pa comercio y pueblo en general? Con lew Gobierno ta cu e
planificacion y implementacion di eGovernment? Tin un plan pa reeduca trahadornan publico pa integra
den un eGovernment cu lo tin data centralisa, y lo cambia e empleadonan pa bira mas servicial y no
solamenta ingresa y procesa data?
Con a para cu e “Landsbesluit prestatiebeoordeling overheidspersoneel” cu a wordo aproba pa
Parlamento 22 december 2022, unda cu Departamento di Recurso Humano (DRH) lo mester a
implementa un “prestatie management systeem” pa cumpli acuerdonan di Landspakket? Un sistema
asina lo ta algo positivo paso empleadonan publico lo por crece mas liher enbes di djis warda un
crecemento anual.
Con a para cu e reduccion di gasto di gobierno, cu tambe ta parti di e Landspakket. Den pasado a papia
di baha e gasto nan di interes di pais Aruba, pero den 2024 unda mundialmente interes a subi, un
strategia asina no ta mes un factibel manera na 2020/2021. Con a para cu e cuentanan anual
(“jaarrekening”) di 2019, 2020, 2021, 2022, y 2023 di Gobierno, cu a wordo priminti cu lo keda cla mas
liher posibel? Lo a sigui un plan structura pa caba y publica e cuentanan anual menciona akiriba, pero te
dia di awe, ni un a keda cla. Cuenta anual no ta solamente un derecho di nos como ciudadano di Aruba
pa haya sa unda nos placa ta wordo gasta/inverti, pero tambe un responsabilidad di Gobierno pa
transparencia di maneho.
Pues esaki ta algun di e preguntanan cu nos tin como sector priva na Gobierno y sindicato, paso nos ta
contento cu a haya un indexering cu tawata “long overdue” pero a cambio pueblo di Aruba merece por
lo menos miho servicio di nos departamentonan y transparencia di nos Gobierno y Mandatarionan.

ATIA

Aruba Trade and Industry Association (ATIA) a wordo funda na aña 1945 y ta e organisacion principal cu
ta representa empresanan, empresarionan y comercio na Aruba. E meta di ATIA ta pa defende, promove
y proteha e interesnan di su miembronan y comercio di Aruba en general. Pa mas informacion por
bishita www.atiaruba.org of nos rednan social www.facebook.com/arubatrade,
www.instagram.com/atiaruba, y https://www.linkedin.com/company/aruba-trade-and-industry-
association