ATIA Sumamente Preocupa Cu Atake Ariba Sistema Di Setar

Pa di 2 biaha den 3 dia Aruba ta haye confronta cu un atake structura ariba e sistema di communicacion ariba nos isla. E impacto ariba nos isla ta desastroso, pa motibo cu gran parti di commercio keda sin communicacion, mescos cu Gobierno y instancianan financiero.

ATIA ta di opinion cu esaki mester wordo trata cu maximo urgencia, seriedad y atencion di autoridadnan concerni, pasobra e motibo no ta conoci, y no por automaticamente asumi cu ta pa “horta den algun lugar”.

Ta hasi un yamada na tur compania cu ta di vital importancia pa nos pais, pa bini hunto y pa trata e atake aki, cu e maximo nivel di alerta. Nos mester preveni cu mentenan maligno ta sigui hasi danjo irreparable na Aruba pa cual e yamada aki riba.


E atake di awe a afecta un gran parti di nos hotelnan, den un tempo cu nos no mester di esaki, exactamente den fin di luna, cu mayoria negoshi ta pusha pa sera nan luna positivamente den e tempo dificil cu nos ta tratando di sali afor.

Sin pone sin kita, nos no por accepta cu algun individuo cu mente asina maligno ta tene henter un pais rehen.

Nos ta hasi un apelacion na henter commercio y ciudadanonan pa ban coopera pa duna tur informacion na autoridad pa e atake aki wordo soluciona y preveni den futuro, y pa autoridad habri liñanan di comunicacion pa pone man riba esnan cu ta atakando nos pais.


Nos ta confia cu nos sistema judicial ta trahando duro pa soluciona e asunto aki, pero ta urgi pa forma un frente nacional, mirando cu ainda nos no por ta sigur kiko ta motiva e atakenan aki, y te na unda nan lo bai, pa causa maximo daño na nos commercio, ciudadanonan y nos pais.

ATIA Preocupa Cu E Situacion Den Comercio Ocasiona Pa E Variante Omicron

Na aña 2021 comercio di Aruba tawata tin varios reto cu a wordo surpasa cu ayudo di sosten di likides di Hulanda y un sector turistico cu a sa di surpasa espectativa. Drentando aña 2022, comercio di Aruba ta enfrenta un reto grandi atrobe, e asina yama variante di COVID Omicron cu tin ATIA sumamente preocupa pa varios rason.



Comercio local

E preocupacion primordial di ATIA ta cu e variante Omicron aki a plama sumamente liher y ta keda plama hopi liher. E maneho adapta door di DVG ta causa cu personanan cu tawata tin contacto cu un persona COVID positivo mester bai den cuarentena obligatorio pa 5 dia. E maneho aki ta conta pa ambos persona cu ta vacuna of no vacuna. Dia 5 di Januari 2022, Aruba a conose un nivel record di contagio contando cu 1162 caso nobo di COVID, di cual 1046 ta personanan local y na total tin 3730 caso activo. Esaki ta sin conta tur persona cu ta “zelf test” y no meld na DVG pa hasi un PCR test.

E maneho di isolacion ta uno cu comercio a custumbra cune y ATIA ta aplaudi cu a ajusta esaki paso e ta baha e precion pa e comerciantenan y ta sigui e maneho mundial. Unda e precion a subi bek ta e maneho di cuarentena ora ta biba na mes un cas. Den pasado, ora un persona ta vacuna, no mester a bai cuarentena obligatorio si no tin sintoma. Hopi comerciante mester adapta nan orario di trabou te hasta sera porta por completo door cu tin varios empleado positivo y e otro nan lo mester bai den cuarentena. Esaki ta hasi cu e comerciante ta perdiendo hopi entrada pa por paga e empleadonan y su  otro gastonan.

Si un persona bai den cuarentena e gasto sumamente grandi ta cai riba e dunador di trabou paso e persona no ta oficialmente AO. SvB a indica cu nan ta proyecta cu e gasto pa e grado di AO ariba e dia ei lo costa alrededor di Afl. 250,000. ATIA ta calcula cu pa comercio e ta costanto actualmente alrededor di Afl. 1 miyon pa dia y e suma ta aumentando diariamente hunto cu e casonan activo paso e dunador di trabou mester cubri e prome tres dia di e empleado su AO mas e 20% di e resto di e dianan cu SvB ta cubri.

Comercio apenas ta recuperando for di e sla mas duro ricibi den nos historia recien, y hopi comerciante no sa con nan lo bai paga e trahadornan infecta (isola) of den cuarentena fin di luna, mientras cu nan negoshi no ta produciendo entrada. Por bisa cu comercio ta den un lock-down virtual door di e cantidad di AO y hopi no lo por wanta e golpi aki na e momento di recuperacion aki especialmente cu no tin sosten di likides mas pa comerciante of FASE.

Turismo

Riba 4 di januari, CDC na Merca a hisa e nivel pa di contagio pa codigo 4, y por a nota varios articulo riba rednan di Media grandi, manera CNN, Apple News etc., indicando pa no viaha bai Aruba. Actualmente Aruba atrobe ta den e top 10 pais nan na mundo cu mas infeccion (Omicron) per capita. Tur esaki ta afecta nos pilar economico cu ta turismo cu ta trece consecuencianan economico pa full comercio di Aruba.

Futuro

ATIA ta positivo cu den 2022 nos lo wak avancenan importante den control y combatimiento di COVID, pero pa awo nos ta recomenda tur persona, cu ta skohe pa esei, pa tuma nan vacuna y booster shot pa haciele mas pronto posibel. Alaves tambe pa nos tur mantene nos mes na e reglanan na vigor di DVG: laba man frequentemente, mantene distancia y bisti mondkap tur caminda. Maneho pa cu e ola aki mester ta skerpi pa comercio por supera e ola di contagio y AO aki cu ta paralisando nos economia.

ATIA ta insigur si Gobierno di Aruba lo por asisti comercio den e tempo dificil aki ya cu Aruba no a haya sosten di likides di Hulanda. Esaki lo por nifica cu lo mester retira empleado y baha gasto pa negoshi por sobrevivi. ATIA ta spera cu dunadornan di trabou no lo mester jega asina lew pasobra esaki ta afecta nos economia negativamente. ATIA ta spera cu nos sali lo mas liher posibel for di e situacion aki. Nos ta pidi e team di maneho pa tene hopi cuenta cu e hechonan aki.

ATIA

Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general.  Pa mas informacion por bishita www.atiaruba.org

Subscribe to our newsletter

And hear the latest insights from our global network of founders, investors and advisors.