Month: July 2023

ORANJESTAD – E tema di BBO na frontera ta uno sumamente alcaso y debati actualmente entre Departamento di Impuesto, nos Gobernantenan y nos comerciantenan. No ta un secreto cu the Aruba Trade & Industry Association (ATIA) mes ta hopi critico riba e posibel introduccion di e ley nobo aki. Pa exactamente e rason aki, ATIA a aserca Directora di Departamento di Impuesto (DIMP) Sra. Luenne Gomez-Pieters pa hasi un session al estilo di un “Town Hall” pa su miembresia, Sr. Henriquez, Director di ATIA a splica. Directora di DIMP a gusta e idea paso e ta un manera diferente y innovativo pa comunica directamente cu comerciantenan. Pa e rason aki Sra. Gomes-Pieters mes a tuma e iniciativa pa invita Director di Aduana, Sr. Ricky Croes pa tambe asisti na e town hall, paso e BBO na frontera lo mester bai simultaneo cu cambio di ley di Impuesto.

Town Hall compara cu session informativo

Sr. Henriquez a informa cu hopi biaha comerciante y gremio ta haya session informativo unda no tin hopi tempo pa hasi pregunta. Justamente pa e rason aki nos a opta pa un asina yama “town hall” cu e meta pa ambos Directora di DIMP y Director di Aduana tene un session informativo breve, pero enfoca mastanto riba contesta pregunta, haya scucha informacion, tips y preocupacion di e miembresia di ATIA den un forma mas social. Prome cu e session Director di ATIA a informa tur presente kico e meta ta di e town hall y con nos lo bai crea un atmosfera “safe” unda por haci pregunta sea en persona of via un aplicacion anonimamente.  Despues di e town hall e participante nan por a gosa di un networking event chikito y socialisa cu otro miembro y presentadornan.

Temanan trata den e session

Directora di DIMP den su presentacion a duna un demostracion di e sistema nobo di Bo Impuesto (BOi), pa mustra e cambio y tambe e conneccion cu sistema di Aduana. Ademas mester indica cu hopi diferente tema y situacion a wordo trata durante e session. Algun tema di suma importancia tawata seguramente e tema di “handelsgoederen” y kico si y no ta wordo considera como un handelsgoed. Tambe e tema di unidad fiscal (“fiscale eenheid”) y con esei lo traha awo cu un BBO na frontera. Mester indica cu ta importante si un comerciante tin un unidad fiscal pa e revisa y actualisa esaki na DIMP, pa no haya problema den futuro. Otro tema tawata esun di e asina yama “teruggaafbeschikking” ora cu DIMP mester debolbe placa na un comerciante. Aki atrobe ta importante pa tur informacion di cuenta di banco di e comerciante ta actualisa, pa no tin problema ora mester debolbe placa.   

Pa cu impuesto di importacion, a toca e tema di simplificacion di e nivel nan di impuesto, unda cu Director di Aduana a duna ehempel amplio di cambionan. Tambe a sigui tocante e servicio di Aduana, freezone, entrepot pa auto y productonan “green” cu ta un tema hopi debati awo riba rednan social. Mester bisa cu ambos Director a contesta tur pregunta y a aclaria hopi incertitumbre di e miembresia, pero tambe a tuma bon nota di tips cu e miembresia a duna cu lo por yuda den futuro.

Satisfecho y agradecido

ATIA ta sumamente satisfecho cu un sala completamente yen, y agradecido na Directora di DIMP y Director di Aduana y nan team pa por a colabora na nos town hall. Si como comerciante bo no a haya espacio pa atende ATIA su town hall, nos ta recomendabo pa sigui e live stream riba Facebook di Kamer van Koophandel djabierna awor pa 10’or di mainta, of un di e otro gremionan cu ta organisando sessionnan similar pa nan miembresia.

Ocasionalmente ATIA por ta critico especialmente riba e dos Departamento nan cu a asisti na nos town hall, pero ta importante pa comunidad y comercio sa cu nos tin bon comunicacion cu gerencia di ambos Departamento cu ta uno basa riba respet mutuo. ATIA lo keda advoca pa reformanan cu lo yuda pa sigui crece y fortifica economia di Aruba, pero tambe continua cu organisacion di sessionnan informativo y eventonan social pa engrandece nos miembresia.

###

ATIA

Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association 

ORANJESTAD – Nos ta scuchando hopi riba e tema di RAFt (Rijkswet Aruba Financieel toezicht) y kico esaki lo significa pa economia di Aruba especialmente si Gobierno di Aruba y Hulanda no yega na un acuerdo. E articulo aki ta solamente pa analisa cuanto extra e lo costa pueblo y economia di Aruba si no yega na un acuerdo cu Hulanda.

Condicion pa fianza di sosten pa COVID-19

E RAFt ta un condicion pa un interes rebaha y mas favorable cu interes riba mercado liber, pa por paga bek e debe di aproximadamente Afl. 900 miyon cu Aruba a fiya di Hulanda den temporada di pandemia. Tecnicamente, e debe aki mester wordo paga na october venidero, paso e fianza tawata un asina yama “bullet loan” unda cu full e suma mester wordo paga bek den 1 solo biaha.

Diferencia di refinancia cu Hulanda of riba mercado liber

Den un entrevista via un plataforma local (NoticiaCla), Secretaria di Estado van Huffelen a informa cu Hulanda ta dispuesto pa refinancia na un interes favorabel di 2 pa 3 porciento, pero si no yega na un acuerdo, cu Aruba lo mester bai fiya riba mercado liber na un porcentahe di 8 pa 10%. Na Aruba e ultimo tanda di bono saca door di Gobierno tawata na 6.5%, cu ta mas cu dobbel kico Hulanda lo ofrece.

Consecuencia si refinancia riba mercado liber

E manera mas facil pa splica ta cu cada porciento di interes lo costa Aruba Afl. 9 miyon pa aña pa porlomenos e proximo 20 aña. Pues si Hulanda refinancia na 2 of 3% e lo costa Aruba entre Afl. 18 y 27 miyon pa aña. Si refinancia riba mercado liber, entre 6 y 10% e lo costa Aruba:

Pues e diferencia entre mercado liber y un refinanciamento cu Hulanda por ta un peso significante riba presupuesto di Gobierno di Aruba. E tabla akibou ta mustra e diferencia entre e diferente porcentahenan si firma e RAFt na 2 y/of 3% y si fiya riba mercado liber na 6, 7, 8, y 10%.

Manera por conclui di e tabla ta cu dependiendo na ki porcentahe e fiansa di Afl. 900 miyon wordo refinancia, lo tin un efecto impactante riba

Di unda Gobierno lo saca fondo pa repaga?

E pregunta cardinal lo ta, di unda Gobierno di Aruba lo bai saca e fondo nan extra pa por paga e interes (y fianza) nan aki anualmente, sin cu e tin cu bin cu mas medida pa pueblo y comercio. E lo ta na benificio di tur hende biba riba nos dushi Aruba pa Gobierno bin na un arreglo of consensus cu Hulanda pa por haya un porcentahe di interes favorabel. Si no por fima e RAFt manera e ta awo, quizas un opcion ta pa firma e RAFt cu un clausula temporal unda por renegocia e termino nan aki algun aña ora cu a cumpli cu tur rekisito. Asina Aruba por gara mas forsa economico den algun aña, sin extra medida cu ta tranca crecimento di nos economia.

###

ATIA

Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association