Diaranson ultimo a tuma luga un evento na e oficina principal di Aruba Trade & Industry Association (ATIA) organisa hunto cu e organisacion Registracion di Companianan di Construccion (RCC) pa comerciantenan cu tin negoshi den e sector di contruccion. RCC ta existi ya pa tres aña caba y a certificando varios compania local di construccion. Herrick Henriquez ta director di ATIA, durante un entrevista cu 24ora.com el a conta cu desde inicio di e organisacion, ATIA ta envolvi tambe. E sector di construccion no tur ora ta competi na e miho forma, sea no ta paga e trahadonan manera mester ta, of ta emplea personanan indocumenta of no ta cumpli cu e standardnan riba mercado internacional.
E fundacion tin como meta pa certifica companianan local. Un certificacion di RCC ta nifica cu bo ta un bon dunado di trabou pero tambe cu e compania ta paga su trahadonan debidamente, ta cumpli cu impuesto y ta paga su premienan, manera mester ta. ATIA ta para tras di e iniciativa aki y ta apoya nan. Locual ta mas importante ta cu, Minister di Economia mr. Geoffrey Wever tambe a saca un carta empoderando y vociferando su apoyo pa cu e programa di certificacion. Esaki ta un bon forma pa combati e economia informal
Por compara e certificacion aki cu Aruba Certified den turismo. Den e mercado di construccion internacional, e ta normal cu ta certifica companianan di construccion. Pa nan por traha cas of proyecto grandi, e ta necesario pa tin e certificacion. Esaki por comproba cu e compania ta confiabel y ta trata su trahadonan manera mester ta.
Na Aruba por mira cu mayoria biaha ora tin destaho publico pa proyectonan grandi, compania di afo ta gana. Esaki ta pa motibo cu e companianan local no ta certifica. Ey ta caminda cu ATIA ta yudando pa duna nos hendenan local e chens pa tambe competi husto y pa sigura cu e placa ta keda lora den economia local. E evento a conta cu un participacion grandi di comerciantenan. Caminda a ricibi hopi informacion y a haci varios pregunta. Awo cu nan ta miho informa, nan sa e rekisitonan pa por yega pa ricibi e certificacion. E certificacion lo tuma luga anualmente. Pues no ta asina cu asina bo hay’e, por baha man na seriedad na trabou. Durante un periodo specifico di aña, RCC lo haci su controlnan y otorga e certificacion. Manera semper, ATIA semper ta combinsa su sessionnan informativo cu un momento pa comparti idea den un ceno mas di ambiente y asina cuminsa papia riba e deal y pa despues yega mas cerca di otro y firma e deal.
