Por a inverti e placa den miho cos en bes di paga interes cu porcentahe halto

Published on:
October 11, 2023

Recientemente director di ATIA a duna su reaccion riba e echo cu gobierno a firma e refinanciamento cu Hulanda pa cu e fiansa di COVID. Ta papia aki di un suma di 916 miyon florin n’un porcentahe di 6.9%.

ATIA no a para keto y mesora a haci algun calculacion. Ta trata di un fiansa pa binti aña largo. Segun Henriquez, e fiansa aki lo costa pais Aruba un total di 85 miyon florin pa aña. Di e suma menciona, como 65 miyon florin ta bay pa paga interes so. Cu tempo cos a cambia. A cuminsa papia di un refinanciamento di 3.1% djey pa 5.1% y na final a firma pa 6.9%.

E ta mescos cu un fiansa di cas. Na cuminsamento ora bo cuminsa paga, e suma ta mucho mas halto y cu tempo pocopoco e ta bay ta bahando. Segun e calculacionnan haci, ta papia di un diferencia di mas cu 30 miyon florin pa aña si compara si a firma pa 3.1% compara cu e 6.9%.

Si mir’e cu ta pa binti aña largo cu lo paga cu e interes di 6.9% ta trata di un suma di 1.7 biyon florin  bek pa cual 800 miyon ta bay na interes. Si compara si a fia na 3.1% compara awo cu a firma na 6.9% ta trata di un suma grandi di diferencia. Ta papia aki di casi 475 miyon extra cu pueblo tin cu paga.

Ta lamentabel mirando cu gobierno no tin vision con lo paga e suma bek. Berdad minister-president a bisa cu e lo sigui negocia pa por purba baha e porcentahe. Durante e conferencia di prensa tambe a menciona cu gobierno ta evaluando pa refinancia henter e debe di pais Aruba, den consulta cu IMF. Comercio ta preocupa cu e desaroyo aki mirando e forma con lo paga esaki bek. 

Subscribe to our newsletter

And hear the latest insights from our global network of founders, investors and advisors.