“MODERNISACION DI MANEHO PA PERMISO DI NEGOSHI” TA UN PASO DEN E BON DIRECCION

Aruba Trade and Industry Association (ATIA) a tuma nota cu Minister di Asuntonan Economico, Comunicacion, y Desaroyo Sostenibel Minister G. Wever a anuncia un “Modernisacion di maneho pa permiso di negoshi” e asina yama “vestigingsvergunning” entrante 1 oktober 2022.
“Red Tape”
Kico ta “Red Tape”? Red tape ta referi na e proceso complica pa cuminsa un negoshi na un pais. Na Aruba nos sa cu e proceso pa haya permiso ta uno largisimo y mester hopi pashenshi, cual ta stroba un economia agil y productivo. ATIA ta advoca pa elimina e asina “red tape” pa añas caba pa asina por engrandece y crece nos economia.
Digitalisa Proceso
Mordernisa, simplifica y digitalisa e proceso pa haya un “verstigingsvergunning” den un manera transparente y eficiente, ta un paso den e direccion corecto, y ATIA ta ansioso pa experiencia e maneho nobo den practica y cu comerciante por haya nan permiso den 2 siman of menos y cuminsa e trayectoria pa habri negoshi. Pero esaki no mester ta e final, esaki mester ta e prome paso pa asina digitalisa e aplicacion pa TUR permiso.
ATIA ta gradici Minister Wever cu e maneho nobo, y na mes un momento ta spera cu minister lo yega na su meta manera e la comunica na ATIA como e “voz di comercio” pa digitalisa TUR permiso cu un negociante mester pa habri su mes un negoshi. Finalmente, ATIA ta spera tur Minister y Departamento cu ta otorga permiso tuma ehempel y liga na e sistema moderno y digital cu tin awo pa otorga permiso den un manera facil y transparente. Menos “Red tape” tin, mas facil ta pa negoshi sigui inverti pa crece nos economia.