ATIA cu un peticion na SVb encuanto e repago di e Loonsubsidie

Na december 2021, ATIA a haci un peticion na tur comerciante cu a haya loonsubsidie pa tuma contacto cu SVb pa asina traha un arreglo di pago pa asina nan por paga bek loke a wordo subsidia dimas den tempo di crisis.
ATIA como e voz di comercio, a hasi un peticion na SVb pa corda cu cada su situacion di likides (“cash flow”) no ta mes un cos y pa trata cada caso individual den un manera prudente y cu comprencion pa e companianan por hasi un arreglo di pago cu no lo hinka e compania den mas problema financiero.
ATIA a bin compronde di varios comerciante cu SVb di berdad a hasi un arreglo di pago, pero esaki mester wordo cumpli cune den 10 luna y cu ta masha dificil pa convence SVb pa extende e arreglo di pago paso e ta uno cu ta cai hopi pisa riba e likides di e compania. Pues casi 2 anja di ayudo mester wordo paga bek den 10 luna. Imagina bo a haya den un anja y mey Afl. 50,000 di mas, cu ta Afl. 2,778 pa luna, y awo cu bo ta recuperando y garando forsa bek, bo mester paga di biaha Afl. 5,000 pa luna.
Aruba tin solamente un luna e mey habri completamente, unda cu comercio pero cuminsa cu e fase di recuperacion pa haya forsa bek. E comerciantenan kier paga, pero pa cumpli cu e arreglo manera e la wordo presenta ta uno cu enves di yuda, lo por kibra e compania.
Pa e rasonnan aki ATIA ta haci un peticion atrobe na e team di SVb pa tuma e situacion di cada compania individualmente, pa asina por recupera mastanto cu por ta posibel. Na Hulandes ta bisa “van een kale kip kan je niet plukken”. Pues di e compania no tin bastante extra likides pa cubri e gasto aki extra, e lo por bai bancarota y esei kiermen den futuro menos placa pa SVb tambe.
Finalmente, nos tin cu corda cu nos a caba di drenta un tempo di recuperacion y cu tawata tin un tempo dificil tras di lomba e ultimo dos anja nan. Yudando SVb door di paga bek e loonsubsidie, porta den un termino mas largo cu a premira (10 luna), lo sigura continuidad di nos comercio y asina segurando pa e peso no cai riba tur e usuario nan di SVb. Ban para solidario cu nos pais y nos pensionadonan!