ATIA A VOCIFERA SU PREOCUPACION NA MINISTER DI ASUNTONAN ECONOMICO

Aruba Trade and Industry Association (ATIA) a pidi un reunion cu Minister di Finanzas y Cultura y Directora di DIMP pa haya mas informacion y aclaracion riba e tema di BBO y e futuro pasonan pa cu e reforma fiscal. ATIA a haya un email como contesta di Directora di DIMP cu den su debida tempo lo yama un reunion pa asina duna mas informacion.
ATIA no a para einan, pero a manda un carta pa Minister di Asuntonan Economico, Comunicacion, y Desaroyo Sostenibel indicando nos preocupacion pa cu e desaroyo di nos economia, reforma fiscal y tambe cu no ta comunicando cu gremionan comercial. Minister Wever a invita ATIA y su directiva pa un reunion unda e lo por duna algun aclaracion ariba e decisionan tuma pa Gobierno di Aruba.
Punto principal cu ATIA a discuti cu Minister Wever ta e reforma fiscal y e decision tuma pa Gobierno pa no sigui cu e esaki. Minister a informa cu mester a tuma hopi factor den consideracion, manera inflacion y poder di compra di comunidad, per tambe cu a tuma den consideracion e conclusionnan di rapport di e experto Dr. Schneider cu a investiga e efecto di un BTW manera e la wordo presenta na stakeholders.
Como ATIA nos a informa cu nos ta preocupa cu e decision tuma ta esun “facil” pero no miho pa nos isla. E reforma total di nos sistema di impuesto lo eventualmente benificia Aruba paso e cumplimento cu e leynan stipula lo ta mas miho, e “compliance” manera nos a vocifera den pasado. Cu un BBO bo ta “straf” e comerciante nan cu ta cumpliendo awo, pero bo ta no ta bai tras di esunnan cu no ta cumpli cu ley. Tambe mester tene na cuanta cu prijsnan na lo wordo affecta directamente pa un decision asina. Como gremio commercial nos ta keda enfoca cu mester baha gastonan structural di nos aparato gubernamental. Si baha gasto gubernamental y hisa compliance, den varios area di impuesto, porta no mester hisa tarifanan mes. ATIA a continua bisa cu nos ta spera cu Gobierno lo sigui traha riba e reforma fiscal den un manera prudente pa nos isla, pa tuma e decision correcto y no esun facil of popular.
Minister no por a comparti e raportnan cu ATIA, pero a informa si cu pronto ATIA lo haya of un copia di e rapportnan di DEZHI y Dr. Schneider, of lo puntra Dr. Schneider mes pa hasi un presentacion di e resultadonan di su estudio. ATIA ta gradici cu Minister Wever a tuma tempo pa sinta cu nos y nos ta en espera di un follow-up meeting.