Gremionan ta dirigi su mes na Gobierno di Aruba; Si por tene un parada nacional, por elimina tur medida inmediatamente.

Februari 11 ultimo, gobierno di Aruba ta anuncia cu lo tene un parada nacional ariba 26 di Februari proximo. Cual anuncio no a cai na bon tera serca commerciantenan; con por ta asina cu ta organisa un evento di tal magnitud tres siman prome cu a priminti di suavisa medidanan pa nos communidad? E pregunta ta surgi: con por ta posibel si ainda tin restriccion ariba commercio? Gremionan: KVK, AHATA, CUA, ATIA, y AFBA, di forma collectivo, ta di opinion cu esaki ta un indicacion fuerte cu no tin ningun necesidad pa restriccion y ta urgi pa tur medida relata na Covid 19 wordo elimina di inmediato (cu excepcion di rekisito pa drenta Aruba).

E gremionan activo a wordo informa cu lo suavisa y elimina mayoria medida dia prome di Maart 2022, pero awor ta nota cu diripente por hala tur cos pa 25 di Februari pa acomoda un evento di gobierno mes. E medidanan vigente, manera orario di cierre y maximo persona na mesa ta sigui perhudica comercio, mientras cu fiesta grandi ta permisibel. Awor nos mesun gobierno ta organisa, pa marca fin di pandemia, un evento di gran escala durante cual lo permiti un multitud di hende sin tapa boca, sin tene distancia, cu tur e consecuencia nan cu esaki lo por tin pa henter e isla.

Di parti di e gremionan ta recomenda gobierno pa prome elimina e medidanan, duna espacio pa midi e resultadonan, y pa despues organisa un evento di gran escala. Sinembargo, si ta sigui cu e parada dia 26 di February, commercio ta di opinion cu no tin base mas pa tin restriccion y cu tur medida lo mester wordo elimina inmediatamente. No tin motibo valido pa tin limitacion ariba negoshinan.

Aruba ta depende di turismo y e commerciantenan no ta mira e balor agrega di un parada nacional na momento cu nos ta den pleno recuperacion financiero. E evento aki tin chance di retrocede un biaha mas e progreso cu nos a haci durante e ultimo luna nan. Nos ta urgi Gobierno di Aruba pa reconsidera e evento aki y tene den un luna manera Mei cu ta low season y lo tin hopi menos riesgo cu e efectonan por ta desfavorecedor pa commercio y na su turno, pa henter nos isla. Cu mas tempo pa planea e evento aki tambe lo tin mas beneficio, manera promocion mas amplio y mihor preparacion di parti di sectornan envolvi den un parada di e magnitud aki.

E gremionan ta desea di enfatisa e desacuerdo cu organisacion di un parada nacional, cual por wordo considera irresponsabel, especialmente tumando na cuenta cu nos isla ta purbando di bai back na normalidad. E evento aki no ta den linea cu locual commercio y henter e poblacion di Aruba a bin ta haci pa asina por opera na un forma cu ta stimula nos economia local. Nos ta curioso pa sa si acaso CDC lo stop di considera e cantidad di caso nan despues di dia 26 di Februari? Y kico lo pasa si en caso e cantidad di contagio subi drasticamente despues e fecha menciona? Nos lo por core riesgo di wordo poni atrobe riba lista di un pais di riesgo halto? Kico esaki lo nifica pa nos economia y con Gobierno di Aruba lo actua en dado caso? Commercio no por biba mas cu restriccion of medida.