Departamento di DIMAS ta trahando duro riba mehoracionan pa brinda un miho servicio na su clientenan. Diamars den un reunion fructifero nan a presenta na e miembronan di hunta di ATIA e proyectonan cu ta tumando lugar den e departamento. Un di e proyectonan ta e digitalisacion y automatisacion di procesonan di aplicacion pa permiso. Conhuntamente cu KPMG nan lo ta introduciendo esaki den varios fase y e expectativa ta pa finalisa esaki den luna di april. E automatisacion di proceso lo hasi posibel pa aplica online enbes di mester fysicamente bishita e oficina di DIMAS.

Ademas ta trahando riba simplificacion di e proceso, reorganisacion di e departamento y un systema cu lo hasie mas facil pa produci estadisticanan necesario pa hasi planificacion riba termino medio y largo posibel. E sigiente paso lo ta conecta e systemanan di diferente departamento cual lo hasi e control riba legitimidad di permisonan mas fasil y transparente.

ATIA a trese dilanti e preocupacion pa cu imigrantenan cu ta wordo busca di otro paisnan pa traha den cierto sectornan pa cual no por hanja hende local, pa loke ta nan edad. Ora personan di edad halto ta imigra pa Aruba, nan contribucion pa fondonan manera SVB y AZV ta limita, cual ta causa cu ora nan yega edad di pension nan tin cu biba di un suma minimo. DIMAS a splica cu ta trahando riba un profil pa imigrantenan cu en berdad ta inclui edad di e persona pero esaki ta solamente un di e varios propuestanan riba mesa pa cu e problematica aki.

ATIA ta aplaudi implementacion di e mehoracionan aki, no solamente pa e miho servicio cu elo trese pero tambe pa e miho control y transparencia cu lo resulta.

Picture DIMAS meeting 1 Picture DIMAS meeting 2