ATIA a tuma nota di aumentonan cu a ser anuncia den e tarifanan pa carga yegando Aruba via Oranjestad y e waf nobo di Barcadera. Como cu cualkier aumento di tarifa of prijs lo (por) tin un efecto inmediato riba prijs di productonan riba nos isla, ATIA a tuma e iniciativa y a reuni cu tanto APA y ASTEC.

Durante e reunion cu Ing. Jossy Figaroa y Sr. Humphrey Tromp di APA y Sr. Mike de l’Isle di ASTEC, a presenta e status pa e waf na Barcadera cu a bay den operacion medio-Februari y tambe e tarifanan cu ta ser modifica pa cubri gastonan.

ATIA a haya e siguiente informacion:
Na 2014 gobierno a acorda cu durante un periodo di 5 aña lo adapta e tarifanan cu un aumento di 4% cada aña. Actualmente ta na di tres aña caba di e acuerdo aki. Despeus lo ahusta e tarifanan cada aña cu e averahe di e cinco aña precedente di e CPI (prijsindex/inflatie). Esaki tin di haber cu cubrimento di e inversion haci door di APA y ASTEC na un manera sostenibel y responsabel segun normanan di financiamento pa cu un proyecto strategico y grandi manera esaki. Ademas di esey a bira necesario e aña aki pa APA reemplasa nan tugboat den nan servicio nautico cu uno nobo mas moderno y cu mas capacidad mirando cu esun actual “Andicuri” lo mester sali for di operacion na mei/juni proximamente y pa locual APA mester a adapta su tarifanan di TUG. Tur esaki ta aporta na aumento di e tarifanan na waf.

E aumento di e tarifanan na waf ta algo cu a premira y sosteni pa un estudio hasi door di AIB pa wak kico lo ta e efecto di esaki. En general e efecto ta minimal si tuma esaki over di un periodo di 25 aña. Ta importante pa informa cu e aumento den e tarifanan pa servicio di TUG no tin di haber cu e mudamento pa e waf nobo na Barcadera, pero cu esaki ta algo inevitabel cu lo mester a pasa si a muda of a keda na Oranjestad. APA den e dianan siguiente lo sinta cu agencianan pa informa nan di e cambionan y e motibonan su tras. ATIA tin comprension pa esaki y mirando cu no tin mucho alternativa lo sugeri na gobierno pa adapta e tarifanan di invoerrechten pa baha e tarifanan na waf.

Efectonan pa comercio local
Di banda di comercio ta importante pa remarca cu comercio local ta depende casi por completo di importacion y mayoria ta yega via nos waf, haciendo esaki e punto principal di entrada. E hecho cu e waf nobo ta mas moderno y eficiente pa brinda un miho servicio ta un bentaha enorme, pero mester ta hopi cauteloso cu cualkier aumento den e tarifanan. E costo di haci negoshi na Aruba y prijsnan ta halto caba y cualkier aumento, aunke bon justifica of minimo, lo bay tin su efecto pa e consumidor.

Alabes Aruba mester keda competitivo den e region si nos kier expande e rol di nos waf como un hub of transit point. Pa por realisa esaki APA y ASTEC a confirma cu e ahustacionnan actual ainda e costonan na Aruba ta competitivo den e region, siguramente comparando cu islanan di mes un tamaño y capacidad. ATIA a reitera su posicion riba e control di e gastonan pa asina no crea un inflacion riba e mercado local door di ahustacion di prijsnan.

Comercio local no tin suficiente espacio pa sigui absorba aumento den gasto di haci negoshi. Ultimo añanan ATIA a bin ta alerta gobierno riba e punto aki continuamente, sin hopi exito. Como un mercado chikito y cu ta depende totalmente di importacion, cualkier aumento den gasto ta crea subida den prijs tambe, creando inflacion y asina pone e presupuesto familiar bou di presion. E margen cu comercio local ta traha cune no ta duna espacio pa absorba tur aumento di gasto.

ATIA ta aplaudi e mudamento di waf pa Barcadera y ta convenci cu e plannan presenta pa tanto APA y ASTEC lo tin su efectonan positivo pa comercio a largo plaso. Siguramente ora cu e conexionan di caminda tambe keda cla y e area cuminsa desaroya den uno mas comercial y industrial conhuntamente cu e FreeZone nobo. Asina creando un atraccion pa inversionistanan pa Aruba.