ATIA a tuma nota cu recientemente Aruba ta wordo asota pa un gran cantidad di incidentenan di inseguridad, cu ta crea preocupacion y hasta panico cerca comercio y pueblo en general. Den ultimo parti di luna di April nos a conoce varios incidente sumamente preocupante. Alaves ATIA tambe a tuma nota di e reaccion di Minister Dowers riba esaki.

Locual ta pasando ta hopi alarmante y ATIA ta sigur cu e tin e atencion necesario di nos autoridadnan,  pero ta evidente tambe cu violencia mester wordo frena a todo costo. E incidentenan di e ultimo simannan ta mustra cu tin un gran cantidad di persona arma na Aruba, cu no ta basila pa usa esaki den actonan violento of pa atraca persona den nan cas of negoshi.

Comercio y pueblo en general ta hopi preocupa cu e brote di violencia desconoci pa Aruba, cu ta asotando nos isla durante e ultimo dianan aki, y ta preocupa cu esaki lo continua y escala si no tuma accion drastico di inmediato. E efecto cu insiguridad ta trece cune pa cu nos economia no por ser medi, specialmente ariba un isla cu pa mas cu 90% ta depende di turismo. E trankilidad y seguridad di Aruba ta un di e factornan principal cu Aruba como destinacion ta asina popular. E eventonan di ultimo simannan por tin un efecto si e racha di violencia aki continua y hasi su entrada den nos sector turistico. Comercio y pueblo ta exigi mas proteccion contra esnan cu ta kere di por cambia e paz y trankilidad cu nos ta custumbra cune.

ATIA ta pidi pa di inmediato gobierno y e partnernan encarga cu seguridad y  ilegalidad informa comercio y pueblo en general kico e plannan ta pa frena e brote di violencia aki, y con nos ta bai stop e fluho di personanan no documenta y ilegal pa sigui drenta Aruba. Seguridad ta un asunto cu ta toca henter comunidad y nos tur mester bin hunto pa asisti nos cuerpo policial y tur otro instancia cu ta percura pa seguridad ariba nos isla. ATIA ta urgi gobierno pa pone fondonan disponibel pa Ministerio di Husticia pa asina por tin mas inversion. ATIA semper ta dispuesto pa scucha y comparti informacion, coopera y bin cu sugerencia pa soluciona asuntonan di vital importancia pa nos pais. ATIA ta sinti cu locual ta pasando ta atacha e fundeshi di nos pais y pa e motibo ey ta expresa su preocupacion publicamente pa asina a corto plaso spera cu gobierno por anuncia accionnan specifico con ta bai reestablece seguridad ariba Aruba.

ATIA ta conta cu un reaccion positivo na unda ta dispuesto pa participa cu ideanan y sugerencianan pa cu e situacion cu na primera bista ta mustra alarmante.

ATIA Building