ATIA representando comercio a tuma nota di e comentario di Minister di Finansas encuanto e introduccion di ley di “Voldoening op Aangifte Winstbelasting” (VAS) y no ta comparti e opinion di e mandatario.

Na 2012, ATIA en berdad a bai di acuerdo y a firma e protocol di Impuesto den Dialogo Social, incluyendo e introduccion di VAS. ATIA no ta contra e introduccion di e ley di VAS, pero si contra e manera cu e la wordo introduci. Ta importante pa remarca cu e ley di VAS conforme e protocol lo mester a wordo introduci na 2013 y no dos aña despues di un manera abrupto. Manera menciona den ATIA su comunicado di prensa anterior: e “deadline” di 30 di december ta inaceptabel mirando cu ta introduci cambionan den vispera di fin di aña cu ta bolbe afecta comercio.

Tambe mester menciona cu ATIA na 2012 a firma pa un pakete total di reformanan y incentivanan fiscal y no solamente algun reforma. Gobierno atrobe ta “cherry pick” locual ta cumbini gobierno y no ta cumpli cu tur e resto di puntonan den e protocolnan firma durante Dialogo Social. Gremionan comercial no tey pa gaba gobierno sino pa vigila y purba mengua e efecto di medidanan di gobierno riba comercio. Gobierno lastimamente no por cu critica y ta “out of touch” cu e situacion cu tin den comercio na Aruba.