ATIA no solamente ta representa e interes di su miembronan y comercio aki na Aruba pero tambe ta activo internacionalmente. ATIA continuamente ta fortaleciendo colaboracionnan y alianzanan entre ATIA y otro Organisacionnan di Dunadonan di Trabou den region y mundialmente.

Como miembro di e Caribbean Employers’ Confederation (CEC), ATIA a wordo aserca pa uni su mes na e directiva di CEC. Sr. Michel Henriquez, Chairman di ATIA, a keda apunta como miembro di e directiva di CEC durante e Asamblea General cu a tuma luga recientemente na Tridinad. CEC ta un agrupacion regional di organisacionnan den e region di Caribe cu ta dedica su mes na e desaroyo y promocion di practicanan di bon relacionnan laboral den un empresa y riba macro nivel y ta comprometi pa logra productividad y prosperidad pa su miembronan y e region en general.

Srta. Kimberly Boekhoudt, Directora Interino di ATIA, tambe a haya oportunidad pa participa den un Master training riba e maneho efectivo di un Business Member Organization. E master training aki a wordo organisa pa e Organisacion Internacional Laboral (ILO) y a tuma luga di 7 pa 11 di Maart na e campus di ILO-ITC na Turin, Italia. Un total di 36 participante di diferente pais rond mundo a participa representando nan organisacion.

Durante e resto di aña ATIA lo sigi traha riba e colaboracion entre ATIA, CEC y ILO pa ofrece tambe actividadnan pa su miembronan. Lasonan cu instancianan internacional ta importante y como tal ATIA ta satisfecho cu e organisacion ta wordo reconoci internacionalmente y ta forma parti di actividadnan cu ta contribui na e profesionalismo di tareanan di ATIA pero tambe ta aporta na e profesionalismo di organisacionnan den region.