E aña aki ATIA su Annual Corporate Event tin como tema principal e reapertura di Refineria na Aruba. Esaki sigur ta un topico actual y sumamente importante pa comercio pero tambe Aruba en general. E reapertura di Refineria ta algo positivo pa Aruba mirando cu esaki a fungi den pasado como un di e pilarnan importante di nos economia.

Durante e Annual Corporate Event e dos oradornan invita Sr. Alirio Zambrano, Project Director di CITGO Aruba Refinery, y Sr. Alvin Koolman, Director di Refineria di Aruba, lo elabora mas ariba kico por spera pa 2017 y e vision pa e añanan nos dilanti. Directora di ATIA a indica cu tin varios pregunta encuanto e efectonan cu esaki ta bai tin pa entre otro nos economia y tambe empleo. ATIA ta haya cu esaki ta e momento indica pa trese mas informacion y debati den un ambiente agradabel ariba e topico aki.

ATIA ta extende un invitacion cordial na tur miembronan di ATIA, gremio comercial y comunidad di Aruba en general pa forma parti di e Annual Corporate Event cu ta un iniciativa di ATIA pa trece hunto e comunidad comercial di Aruba y na mes momento recauda fondo pa e asociacion. E evento lo tuma luga dia 2 di december venidero na Marriott Aruba Resort & Stellaris Casino cuminsando for di 7or di anochi cu un welcome reception, sigi pa e parti oficial cu e oradornan invita y lo culmina cu un recepcion cu entretenimento di Tsunami.
ATIA kier a gradici Caribbean Mercantile Bank N.V., Refineria di Aruba, CITGO Aruba Refinery y Pepia Est pa nan aporte pa haci e evento aki posibel un biaha mas. Ticketnan pa e Annual Corporate Event ta obtenibel solamente na ATIA. Pa mas informacion of reservacion di ticket por yama 582-7593 of email na info@atiaruba.org.

Aruba Trade and Industry Association (ATIA) a wordo funda na aña 1945 cu e obhetivo principal pa proteha e interes di e miembronan, promove un ambiente comercial y un clima di inversion di calidad halto riba nos isla. ATIA su miembresia ta representa directamente of indirectamente mas di 80% di empleo di e sector priva di Aruba. ATIA ta continua cu su aporte na defini un clima socioeconomico di Aruba. ATIA ta situa na Pedro Gallegostraat 6, pa mas informacion tocante miembresia yama 582-7593, bishita www.atiaruba.org of nos pagina riba facebook: www.facebook.com/arubatrade.

dsc_2347