ATIA como gremio comercial, a wordo invita pa medio di Gobernador di Pereira y Alcaldia di Risaralda pa participa na un evento special pa celebracion di e 50 aña di existencia di Risaralda.

Risaralda ta un lugar special na unda turismo sostenibel ta un di nan pilarnan fuerte di nan economia. Risaralda ta conoci como un region cu ta cuida su naturaleza y parhanan di tal forma cu e ta e unico bosque reconoci pa medio di UNESCO como bosque modelo den nos region. Risaralda tin conservacion como topico di enseñansa den nan sistema educativo.

Mirando con conservacion y sostenibilidad ta un tema di primordial importancia pa economia di cualkier pais, pero aun mas di un isla, ATIA a hasi uso di e invitacion aki pa purba comparti e experiencia di conservacion aki cu 15 mucha entre edad di 11 pa 13 aña di Aruba.

Pa medio di companianan cu ta realisa e balor di sostenibilidad y ser ciudadanonan corporativo responsabel, e hobennan aki por bishita e evento aki for di dia 31 di januari pa 5 di februari 2017. ATIA kier a gradici esnan cu ta realisa e importancia di concientisa nos pais ariba e tema di conservacion y crecemento sostenibel muy en especial pa medio di nos hubentud.

Mester menciona cu for di comienso cu e idea a nace pa incorpora nos hubentud den e projecto aki, a ricibi e atencion y cooperacion di Minister Michelle Hooyboer cu a duna tur cooperacion pa e projecto aki ser realisa.

E companianan cu a hasi e viaje aki posibel ta: Total Finance, CMB, Western Union, Aruba Bank, Total Services, Guardian Group, WEB, Setar, Ernst & Young, Plus Accountants y ATIA. Tambe un danki special ta bai na Sra. Lina Rios representante di Colombian Adventures cu a coordina tur detayes di e viaje aki.

E viaje aki tin como meta pa mustra nos hubentud e importancia di con importante cuido di nos medui ambiente ta pa medio di conservacion y crecemento sostenibel, especialmente ariba un isla cu un area limita. ATIA ta spera cu e hobennan aki lo experiencia un siman inovidabel cu lo motiva nan pa sigui conta e experiencia unico aki na scolnan y barionan na Aruba, y pa crea “embahadornan” di conservacion bou di nos hubentud.

Aruba Birdlife Conservation tambe a wordo invita y lo ser representa pa su presidente Sr. Greg Peterson, cu lo ta un orador especial durante e programa na Risaralda.

Gobernacion di Pereira y Risaralda a invita Gobierno di Aruba y ATIA ta contento cu Prome Minister Eman a acepta e invitacion y lo lidera e delegacion di Aruba pa Risaralda, mandando un señal importante cu Aruba ta wak crecemento sostenibel como un punto importante di gobernacion.

ATIA un biaha mas kier a gradici tur sponsor, Ministerio di Educacio y Sra. Juliet Carvahal, Aruba Birdlife Conservation pa medio di Sr. Greg Peterson, Sr. Armando Goedgedrag pa su contribucion durante e viahe aki, Colombian Adventure, Minister President y tur e hobennan y mayornan cu lo participa na e evento unico aki den nos region.

20170126_200312-001