Durante di un reunion cu a tuma luga recientemente entre Ministerio di Husticia y Cuerpo Policial, y comerciantenan, Michel Henriquez, president di Aruba Trade and Industry Association (ATIA) a anuncia cu Cuerpo Policial lo ta dunando un presentacion pa miembronan encuanto di prevencion di criminalidad pa comercio. ATIA ta aplaudi e forma pro-activo cu Cuerpo Policial ta trahando den e sentido aki sigur, unda cu nan ta dispuesto y ta ofrece na un forma activo y pro-activo pa asisti comerciantenan pa haci nan negoshi y empleadonan mas fuerte contra criminalidad.
ATIA ta haya importante cu tin transparencia pa cu cifranan di criminalidad, y ta comparti nan cu e comunidad comercial di Aruba, Henriquez a laga sa.
Algun di e puntonan principal cu a saca for di e reunion ta cu ta trahando riba criminalidad, tin plannan di accion cu lo wordo aplica y ta atacando e problema di criminalidad riba Aruba, no solamente riba caya, pero den comunidad mes cu bishitanan pa scolnan y instancianan pa ofrece sesionnan di informacion.
Henriquez a bisa cu ta aprecia cu Cuerpo Policial ta comunica cu e gremionan y negoshinan pa informa nan di nan accionnan, naturalmente sin bay afo y comparti nan plannan concreto. Esaki ta duna un sentimento cu tur hende por keda sigura cu tin atencion pa tur loke ta pasando, kico ta e trendnan mas nobo y di unda nan ta bin, pero tambe cu no necesariamente cada ciudadano tin chens di hay’e confronta cu criminalidad na su cas.
E situacion di Venezuela tur area den nos region ta confronta cun’e y tin un plan p’esey, Michel Henriquez a bisa, basa riba informacion cu a ricibi for di Cuerpo Policial.
Lo tin mas control na e costanan y luganan unda cu e hendenan ta drenta, el a agrega. Lastimamente e gran parti di personanan cu ta bin for di Venezuela y ta keda ilegal na Aruba ta drenta legalmente via di aeropuerto, Henriquez a comenta, e ta algo dificil y fastioso pa controla, y mester di cooperacion di Hulanda pa logra miho control. El a agrega cu a wordo bisa cu tin palabracion y combersacionnan andando caba cu Hulanda pa cu e situacion aki.

ATIA Building