Recientemente ATIA a tuma nota cu gobierno a anuncia algun decision cu lo bai na vigor Januari 2017. Gobierno den pasado tawata informa comercio di su decisionnan pero parce cu esei ta pertenece na pasado.

Comercio cu ta luchando den un economia cu actualmente no ta creciendo y cu un gran cantidad di negoshi chikito y mediano luchando, sin mas ta dicidi aumenta e gasto di salario cu 2%. E salario no ta aumenta solamente pa esnan cu e salario stipula pa gobierno pero automaticamente pa esnan cu ta ariba esaki tambe cu consecuencia comercio ta wordo confronta cu un aumento di gasto imponi den un tempo y anja cu por ser catogoriza sigur como dificil.

ATIA semper ta dispuesto pa duna su punto di vista y dialoga pa jega na compromisonan na beneficio di nos economia y nos clima di inversion. Lamentablemente tal dialogo no ta tuma luga mas y gobierno ta impone ariba comercio gasto sin tene consideracion cu e efecto cu esaki por tin ariba empleo y inflacion y ta significa un aumento di gasto ariba negoshinan.

ATIA tambe a tuma nota cu e prijs di awa y corriente lo bai baha na un forma desproporcional pa negoshinan na Aruba. Atrobe comercio ta ricibi un reduccion chikito di locual lo ser compensa? Cu e acto aki ta parce cu gobierno ta duda den e mecanismo di control di prijs na Aruba y e effecto cu un mercado liber competitivo tin. Na parecer di ATIA dunando comercio un parti igual na locual ta duna e consumidor priva lo tin un efecto multiple y hopi mas grandi ariba inversion, inflacion, empleo y sobreviviencia di negoshi na Aruba. Ademas, lo manda un senjal cu negoshinan por tin confianza den e temporada nos dilanti. Gobierno ta manda un senjal net al contrario door di unilateralmente dicidi gasto y manejo economico pa comercio.

ATIA ta preocupa cu e tendencia aki y ta urgi gobierno pa tene bon cuenta cu nos mester crea un vision cu ta duna confianza. E senjal ricibi cu e decisionan aki tin e efecto contrario y ta confundi comercio na Aruba.

ATIA Building