Diasabra dia 16 di april ATIA lo tene su seminario “People Management” na Universidad di Aruba cu lo cuminsa for di 9.00 di mainta pa 2.30 di atardi. E aña aki e seminario ta wordo organisa conhuntamente cu Medwork, Advance Human Resource Services, Corporate Health Solutions, Monica Kock & Partners y PricewaterhouseCoopers.

Mesun cos cu añanan anterior cuater topico di suma importancia lo wordo trata:
– Maneho di Talento: Con pa retene y desaroya talento den bo compania
– Rekisitonan pa un maneho di verzuim efectivo
– Examen medico den e campo laboral, tin sinti of no?
– Sistema pa evalua con empleadonan ta funciona

Obhetivo
E seminario lo duna dunadornan di trabou y/of directiva di recurso humano e instrumentonan necesario pa maneha e personal na un manera mas eficiente. Lo ta bai tin splicacion encuanto posibilidadnan legal, medico y solucionnan practico.

E seminario aki ta unico den sentido cu e temanan lo wordo trata den grupo chikito y den un manera interactivo den e lokaalnan di Universidad di Aruba. Tur hende presente lo bay intercambia di idea y experiencia hunto cu e orador profesional concerni.

Oradornan
E tema “Maneho di Talento: Con pa retene y desaroya talento den bo compania” lo wordo trata door di Sra. Charlene Nectar, Sr. HRM Advisor, Trainer & Facilitator di Advance Human Resource Services. “Rekisitonan pa un maneho di verzuim efectivo” lo wordo trata door di Sra. Angelique van der Horn, Occupational Health Consultant na Medwork y Sr. Tristan Monzon, General Manager na Corporate Health Solutions. “Examen medico den e campo laboral, tin sinti of no?” lo wordo trata door di Sr. Anton Isaak, Health Consultant di Medwork hunto cu abogado Sra. Diana Carolina Lopez Paz di Monica Kock & Partners cu lo relata riba e parti legal di e procedimento. Por ultimo e tema “Systema pa evalua con empleadonan ta funciona” lo wordo trata door di specialistanan di PricewaterhouseCoopers, Sra. Shelby Maduro, Sr. Consultant y Sra. Anna Maduro, Human Resources Manager.

Inscripcion
Pa inscripcion of mas informacion por tuma contacto cu Sra. Marilyn Orman na 582-7593 of email na info@atiaruba.org. Sea asina bon di confirma bo participacion prome cu dia 11 di april 2016.