ATIA representando comercio a tuma nota di e situacion na waf di Barcadera unda Douane a pone trabow abow y consecuentemente cera  e kraanchi di nos economia den protesta tocante di regla di seguridad.

Diahuebs ultimo ASTEC y SADA a purba di sali for di nan diferencia di opinion tocante e reglanan di seguridad pa subi tereno di waf na Barcadera segun normanan internacional di ISPS manera supervisa door di DSA (Directie Scheepvaart Aruba) y APA. Lamentablemente esaki no a yega na un solucion. ATIA den interes di comercio di Aruba ta respeta derecho di tur organisacion pero no por ta asina cu ta cera entrada di producto pa un diferencia di opinion.

Aruba ta depende pa mas  cu 95% di importacion di producto for di exterior y un accion asina ta perhudica comercio y Aruba en general. Un daño incalculable ta wordo haci na nos economia y Aruba, mientras cu mester tin otro manera pa soluciona e situacion aki na mesa sin yega na un accion asina dañino pa nos pais.

ATIA ta lamenta cu e situacion aki a bay for di man y mester a yega na un caso den corte. ATIA representando comercio mester sali na vanguardia di comercio y ta spera cu asina por para e daño enorme cu e accion aki ta causando.

ATIA Building